இளைஞர்களுக்காக,இளைஞரால்.... இத்யாதி இத்யாதி!

“ஹலோ!யாரு குட்டனா? பழையபடியும் எழுத ஆரம்பிச்சுட்டீங்க போல!”

”ஏன்,எழுதக்கூடாதா?”

“அப்படி இல்ல .நீங்க கட்டாயம் தொடர்ந்து எழுதணும்.எங்களை மாதிரி இளைஞர்களுக்காக வலைப்பூ  நடத்தும் இளைஞர் நீங்க தொடர்ந்து எழுதணும்.அதுதான் எங்க ஆசை’

“ரொம்ப நன்றிங்க”

இது போல் நேற்று முதல் பத்துக் கால்கள்.

எவ்வளவு மகிழ்ச்சியான செய்தி?

ஹூ…ம்!

இப்படி நடந்தால் நன்றாகத்தான் இருக்கும் .

ஆனால் நடக்கவில்லையே!

நானே ஏதாவது இப்படி நினைத்துப் பார்த்தால்தான் உண்டு!

ஒரு ஆறு பேரைத்தவிர யாரும் ஒண்ணும் சொல்லவில்லை.

எட்டிப்பாத்தவங்களே மொத்தம் 117 பேர்தான் இது வரை.

இதுக்காக எல்லாம் எழுதாம இருந்துவிடுவேனா என்ன?

எழுதத்தான் போகிறேன்.

இளைஞர்களுக்காக,இளைஞரால் நடத்தப்படும் இளைஞர் வலைப்பூ!

இதை ஏன் சொல்ல வேண்டும்?

எல்லோருக்கும் தெரியும் இது ’இளைஞர்களுக்கான’ வலைப்பூ என்று

எனவே அதை நீக்கி விடலாம்.

நான் இளஞன் என்பதை திரும்பத் திரும்ப சொல்ல வேண்டிய அவசியம் இல்லை

எனவே இளைஞரால் என்பதை நீக்கி விடலாம்.

பதிவின் எழுத்தே சொல்லும் இது இளைஞர் வலைப்பூ என்று.

எனவே இளைஞர் என்பதை நீக்கி விடலாம்.

கடைசியில் வலைப்பூ!

இது வலைப்பூ இல்லாமல் வேறு என்ன?

எனவே அதையும் நீக்கி விடலாம்.

மிஞ்சியிருப்பது.....ஒன்றுமில்லை!

அதுதான் இந்த வலைப்பூ!!

டிஸ்கி:இப்போதுதான் கவனித்தேன்.சென்ற பதிவுடன் ட்ரிபிள் செஞ்சுரி அடிச்சுட்டேன்!

ஆதரவுக்கு(!) நன்றி!

வயசுக்கு வந்த பெண்!

இன்று காலை தங்கமணியின் சூடான செய்தி—”என்னங்க! 4-பி ராதா மக கலா பெரியவ ளாயிட்டா!”

எவ்வளவு முக்கியமான செய்தி பாருங்கள்.

சீனிவாசன் பதவி விலகினால் என்ன,விலகாவிட்டால் என்ன;

அரசியலில் ஊழல்கள் நடந்தால் என்ன நடக்காவிட்டால் என்ன;

தங்கமணிகளுக்கு இது முக்கியச் செய்திதான்!

ஆனால் எனக்குக் கொஞ்சம் வருத்தம்தான்.

ஆம்!ஒரு குழந்தை பதினோரு வயதில் பெரிய மனுசி ஆகி விட்டாள்.

புதிய பொறுப்புகள் ,புதிய கவலைகள் அவளுக்கும் அவள் பெற்றோருக்கும் வந்து சேர்ந்து விட்டன.

இனி திரும்பி வருமா அந்தகள்ளமில்லாக் குழந்தைப் பருவம்?

இப்பொதெல்லாம் பழைய காலத்தை விடப் பெண்கள் விரைவிலேயே பூப்பெய்தி விடுகிறார்களே,ஏன்?

மாறி வரும் வாழ்க்கைச் சூழல்கள்,நாகரிகம்,உணவுப் பழக்கங்கள்,பல காரணங்களால் ஏற்படும் மன அழுத்தம்,இவையெல்லாமே சில காரணங்கள்.

திருமணம் 18 வயதில்தான் எனச் சட்டம் சொல்கிறது.

ஏனெனில் அது வரை மனம் முதிர்ச்சியடைவதில்லை.

ஆனால் வயது ,பருவம் முதிர்ச்சியடைந்து விட்டதே!

பள்ளிப் பருவத்திலேயே காதல் தொடங்கி விடுகிறதே!

பெற்றோர் வயிற்றில் நெருப்பைக் கட்டிக் கொண்டல்லவா இருக்க வேண்டிய இருக்கிறது!

ஆக தற்காலத்தில் பெற்றோர்களின்பொறுப்பு,கவலை எல்லாம் அதிகமாகி விட்டது .

பொறுப்பு அதிகமாகி விட்டது என்பதைக் குறிக்கவே இதைச் சொல்கிறேன்.திருமண வயதைக் குறைக்க வேண்டும் என்பதற்காகச் சொல்கிறேன் எனத் தவறாக எண்ண வேண்டாம்!

முன்பெல்லாம் இந்த நிகழ்வைச் சிறப்பாகக் கொண்டாடுவார்கள்

திரைப்படங்களில்தான் பார்த்திருக்கிறேன்--முறைமாமன் ஓலைத்தட்டி பின்னி அதன் மறைவில் பெண் அமர்வதையும் நீராட்டு என்பது பெரும் விசேசமாகக் கொண்டாடப் படுவதையும். இப்போதெல்லாம் கிராமங்களில் கூட இதெல்லாம் நடக்கிறாதோ என்னவோ தெரியாது.

சில பெண்கள் பூப்பெய்தாமலே இருந்து விடுகிறார்கள்.

அவ்வாறு பூப்பெய்தாமலே இருந்து விடும் பெண்களை ‘இருசி’ என்று சொல்வார்கள்

அப்படிப்பட்ட ஒரு பெண்ணைப் பற்றிய   தனது தென்னங்கீற்று என்ற நாவலை திரு கோவி மணிசேகரன் இயக்கினார்.படம் தமிழில் தோல்வி அடைந்தது

சரி, பெண் வயசுக்கு வருவதைப் பெரிதாகச் சொல்லும் நாம் ஆண் வயதுக்கு வருவதைக் கண்டு கொள்வதில்லையே ஏன்?

ஒரு சிறுவன் வயசுக்கு வருவது அவன் பெற்றோருக்கு என்ன அவனுக்கே தெரியாது என நினைக்கிறேன்!

.

புத்தகக் கண்காட்சி-ஒரு வித்தியாசமான பார்வை..படங்களுடன்!

விடுமுறை நாட்கள் முடிந்தபின் இன்று புத்தகக் கண்காட்சிக்குச் செல்வதென ஏற்கனவே முடிவு செய்தபடி இன்று மாலை 3.30 மணி அளவில் வீட்டை விட்டுப் புறப்பட்டு, தானியில் 4 மணி அளவில் கண்காட்சி நடக்கும் ஒய்.எம்.சி.ஏ,மைதானத்தை அடைந்தேன்.சென்ற ஆண்டு கண்காட்சி நடக்கும் இடத்தை அடையும்போதே களைப்படைந்தது போல் இல்லாமல் இந்த ஆண்டு இலவச வாகன  வசதி ஏற்பாடு செய்யப்பட்டிருந்ததால்  எளிதாக  கண்காட்சி அரங்கை அடைந்தேன்.

 

    இலவச ஊர்தி

    திரும்புகையில்

பத்து ரூபாய் கொடுத்து நுழைவுச்சீட்டு வாங்கிக் கொண்டு அரங்குக்குள் நுழைந்தேன்

நுழை வாசல்    

      உள்ளே நுழையும்போதே அதிகபட்சம் 2.30 மணி நேரமே செலவழிக்கத்                        திட்டமிட் டிருந்த படியால்,ஸ்டால்களைத் தேர்ந்தெடுத்து என் சுற்றலைத் துவங்கினேன்.மொத்தம் பத்து அரங்குகளுக்குச் சென்றிருப்பேன்!இன்று விடுமுறை நாளாக இல்லாததால் பதிவர்கள் யாரையும் பார்க்கவில்லை.அப்படி யாராவது வந்திருந்து அவர்களை நான் பார்த்தாலும் அவர்களுக்கு என்னைத் தெரியாது...ஒரு சோட்டா பதிவர்தானே!.டிஸ்கவரியிலும் யாரும் இல்லை.திரு வேடியப்பன் பிஸியாக இருந்தார்.

                                            

 

                                                     டிஸ்கவரியில் வேடியப்பன்
நான் முப்பது புத்தகங்களெல்லாம் வாங்கவில்லை,வாங்கிய புத்தகங்களின் சாம்பிள் ஒன்று கீழே!

                                          

 

 அவ்வாறு சென்று கொண்டிருந்தபோதுதான் கீதா பிரஸ் ஸ்டாலில் ஒரு பதிவரைப் பார்த்தேன்.அவரை எனக்குத் தெரியும்.நான் பார்த்தபோது சன் டி.வி. பெண் நிருபர் அவர் முகத்துக்கு நேராக மைக்கைப் பிடித்திருக்க அவர் காமிராவைப் பார்த்தபடி ஆன்மீகம் பற்றி ஏதோ பேசிக் கொண்டிருந்தார்.அந்தப் பதிவர் திரு.சென்னைபித்தன் அவர்கள்!அதைப் படம் எடுக்க மறந்து விட்டேன்!

இம்முறை ஓய்வெடுக்கவும் இடம் ஒதுக்கியிருக்கிறார்கள்.நிம்மதியாக அமர்ந்து சிறிது நேரம் ஓய்வெடுத்தேன்

                                                   

   
     வெளியே வந்தபின் அரங்கில் ஏதோ நடன நிகழ்ச்சி நடந்து கொண்டிருப்பதைப் பார்த்தேன்
                                       

 

               பஸ்ஸில் ஏறி கேட்டை அடைந்து தானியில் ஏறி வீட்டை வந்தடைந்தேன்!
                                
      இன்னொரு நாள் மீண்டும் போக ஆசை!.......இன்ஷா அல்லா!
                                  

 லேட் டிஸ்கி:    ”நான் முப்பது புத்தகங்களெல்லாம் வாங்கவில்லை” என்றுதான் நான் எழுதியிருக்கிறேன்.ஆனால் பின்னூட்டங்களைக் காணும்போது நான் முப்பது புத்தகம் வாங்கியதாகத் தவறாகப் புரிந்து கொளப்பட்டிருப்பதாக நினைக்கிறேன்.மன்னிக்க!

                                                                                                                                                                        

                                                                                                                                                                              

.

பதிவர் திருவிழாவுக்குப் போவதா?போகாமல் இருப்பதா?

ஷேக்ஸ்பியரின் “ஹேம்லெட்”டில் மிகப் பிரசித்தமான தனியுரைப் பகுதியில் அதிகம் பேசப் பட்ட ஆரம்ப வரி இது...................

“to be or not to be,that is the question “..

”இருப்பதா அல்லது இறப்பதா அதுதான் கேள்வி”

அது போல் சில நாட்களாக என்னை நானே கேட்டுக் கொள்ளும் கேள்வி........

“to go or not to go”’’’’

“போவதா  அல்லது போகாமல் இருப்பதா”

ஹேம்லெட் போலவே நானும் குழம்பிப் போயிருக்கிறேன்!

என்ன இது எனக் கேட்கிறீர்களா!

நிகழும் ஆவணித் திங்கள் 16 ஆம் நாள்   (01-09-2013) ஞாயிற்றுக்கிழமை நாழிகை 7.30க்கு மேல் (காலை 9 மணிக்கு மேல்) சென்னை வடபழனியில்,கமலா திரையரங்கை ஒட்டி இடது புறம் உள்ள”திரைப்பட இசைக்கலைஞர்கள் சங்க” அரங்கில்  நடைபெற இருக்கும் வரலாறு காணாத பதிவர் திருவிழாவுக்கு...........

“போவதா அல்லது போகாமல் இருப்பதா? அதுதான் கேள்வி”


ஏன் இந்தக் கேள்வி? இது போன்ற ஒரு அரிய வாய்ப்புக் கிடைக்கும்போது,சக பதிவர்களை ஓரிடத்தில் சந்தித்து உரையாடி மகிழும் வாய்ப்புக் கிடைக்கும்போது பயன் படுத்திக்கொள்ள வேண்டாமா?

அவசியம் வேண்டும்.

ஆனால் என் பிரச்சினைகள் நான் திருவிழாவுக்குச் செல்வதற்குத் தடையாக இருக்கின்றன.

எனவே குழப்பம்!

இந்தக் குழப்பத்திற்கு விடை ஏதாவது பதிவரிடம் கேட்கலாம் என தமிழ் மணம் பக்கத்தைத் திறந்து கண்ணை மூடிக் கொண்டு ஒரு இடத்தில் தொட்டேன்.பார்த்தேன் ஒரு பதிவர் பெயரை;நல்ல வேளையாக அவரது அலைபேசி எண்ணும் கிடைத்தது.

தொடர்பு கொண்டேன்.

“ஹலோ,”

“சார்.........ங்களா?

ஆமாம்.நீங்க யாரு?

நான் பதிவர் குட்டன் பேசுகிறேன்.

குட்டனா?நான் கேள்விப்பட்டதேயில்லையே?(முதல் குட்டு)

சார் நான் ஓராண்டுக்கும் மேலாக எழுதி வருகிறேன்.

ஒகோ!வலைப்பூ பெயர் என்ன?

“குச்சிமிட்டாயும் குருவி ரொட்டியும்”

சிறுவர்களுக்கான வலைப்பூவா?

இல்லை சார் இளைஞர்களுக்கான வலைப்பூ.

ஓ!பெயர் குச்சி மிட்டாய் ,குருவி ரொட்டி என்றெல்லாம் இருக்கவே சிறுவர் வலைப்பூவோ என எண்ணினேன்.

சிறுவர் வலைப்பூ இல்லை ;ஆனால் சில சமயம் கொஞ்சம் சிறு பிள்ளைத் தனமாக எழுதுவேன். ஆனால் கொஞ்சம் பிரபலம்தான்;தமிழ் மணம் இன்றைய ரேங்க் 16. முன்பு ஏழு வரை முன்னேறி யிருக்கிறேன்.

உங்கள் பதிவின் தரத்துக்கு இது ஒரு அளவுகோல் எனப் பைத்தியக்காரத்தனமாக நினைக் கிறீர்களா!ஏழு வரை முன்னேறினேன்(!)என்று சொல்கிறீர்கள்; வதவத என எழுதித்தள்ளியிருப்பீர்கள்.எழுதப்படாத ஒரு விதி சொல்கி றார்களே-மொய் வைத்து மொய் எடுப்பது-அதைத் தவறாமல் பின்பற்றியிருப்பீர்கள். அவ்வள வுதான்.உங்கள் ரேங்க் நிச்சயமாக உங்கள் பதிவின் தரத்துக்குச் சான்றல்ல!”

அப்படியென்றால் அதிகம் எழுதுவதே தவறு என்று சொல்கிறீர்களா?

அப்படியில்லை .எழுதுவது இயல்பாக வரும்போது எத்தனை வேண்டுமானாலும் எழுதலாம்.ஆனால்தமிழ்மணம் ரேங்கைக் குறிவைத்து அதைப் பெறுவதற்காக எழுதுவது தவறு என்று சொல்கிறேன்.அவ்வாறு எழுதும்போது,தினம் ஒரு பதிவாவது எழுதியாக வேண்டும் என உங்களுக்குள் ஒரு நிர்ப்பந்தம் ஏற்பட்டு,எதை வேண்டுமானாலும் எழுதும் நிலை ஏற்பட்டு விடுகிறது.பொருளற்ற பகிர்வுகள் பிறந்து விடுகின்றன!

மிஸ்டர் குட்டன்!உங்களுடன் பேசிக் கொண்டே உங்கள் பதிவுகளையும் படித்துக் கொண்டி ருக்கிறேன்.சில பதிவுகள் நன்றாக இருக்கின்றன.சில மொக்கை..ஓட்டு,ரேங்க்இந்த மாயையில் சிக்கிக் கொள்ளாமல் எழுதுங்கள்

”சாரி!நீங்கள் எதற்குத் தொலை பேசினீர்கள்?”

பதிவர் திருவிழா வருகிறதே; ஒரு வலைப்பதிவராக அதற்குப்போக ஆசை இருக்கிறது; ஆனால்தடையாகச் சிலப் பிரச்சினைகள் இருக்கின்றன.அதுதான் உங்கள் ஆலோசனைக்காக ....................... 

“சரியான குழப்பவாதியாக இருக்கிறீர்கள்.உங்கள் விருப்பம் ,சௌகரியம் இவற்றை அனுசரித்து நீங்கள்தான் முடிவு எடுக்க வேண்டும்.முழுநாள் கலந்து கொள்ள முடியாவிட்டால் சிறிது நேரம் சென்று பதிவர்கள் பலரைச் சந்தித்து வரலாம்.விழா பற்றியதகவல்களுக்கு   ”தமிழ் வலைப்பதிவர்கள் குழுமம்”என்ற தளத்தை பாருங்கள்!வாழ்த்துகள்”

இணைப்புத் துண்டிக்கப்பட்டது.

இன்னும் முதல் கட்டத்திலேயே நிற்கிறேன் .......

போவதா அல்லது போகாமல் இருப்பதா?..........

அதுதான் கேள்வி?! 

டிஸ்கி:சகோதரப் பதிவர்களே (சக +உதரம் என்று சொல்லும்போது இரு பாலாரும் அடக்கம்).
கட்டாயமாகப் பெருந்திரளாகக் கலந்து கொண்டு விழாவைச் சிறப்புறச் செய்யுங்கள். ஏற்பாடுகள் சிறப்பாக முனைப்புடன் நடந்து வருவதாக அறிகிறேன்.இன்று தேதி 12..இன்னும் 19 நாட்களே பாக்கி,கலந்து கொள்ள விரும்பும் பதிவர்கள் விரைவில் தங்கள் வருகை பற்றி மேற்சொன்ன பதிவில் குறிப்பிடப்பட்ட  நண்பர்களுக்குத் தகவல் தெரிவித்து விடுங்கள்.

வாழ்த்துகள்!