Thursday, June 6, 2013

ஆடை இன்றிப்போன அரசன்!



அரசன் ஒருவனுக்கு வந்ததொரு ஆசை!

அணிய வேண்டும் ஒரு மெல்லிய ஆடை

அழைத்தான் நாட்டின் நெசவாளர்களை

ஆணையிட்டான் தன் ஆசையை நிறைவேற்ற

ஆடைகள் பல வந்து குவிந்தன அரண்மனையில்

அழகு பட்டில், பஞ்சில்,பருத்தியில் பலப்பல

அத்தனையும் ,மோதிரத்தில் நுழையும் அளவே!

அரசனுக்கு அவை எல்லாம் ஆசைப்படி இல்லை

அடியோடு நிராகரித்தான் அனைத்து ஆடைகளையும்

அப்போது வந்தான் அந்த நெசவாளி

அரசே பாருங்கள் ஆடை இதன் நேர்த்தியை

அத்தனை மென்மை கண்ணுக்கே தெரியாது

ஆடை தெரிவதற்கு கலைக்கண் வேண்டும்

அறிவு வேண்டும் அரும் பெரும் மாட்சி வேண்டும்.

அரசனும் பார்த்தான்;ஏதும் தெரியவில்லை

ஆனாலும் சொல்லப் பயம் அறிவில்லை என்றாமோ?

ஆடையை அரசனுக்கு அணிவித்தான் நெசவாளி

அரசனும் புறப்பட்டான்  ஊர்வலம் நாட்டோர் காண

அத்தனை பேரும் அச்சத்தில் வாய்மூடி நின்றிருக்க

அலறி எழுந்தது ஒரு குரல் அனைவரும் கேட்க

“அய்யய்யோ அரசர் அம்மணமாய்ப் போகிறார்!”

அச்சம் அறியாத சிறுவனவன்!

அடடா!அச்சிறுவன் எங்கே போனான் ?


ஆயிரமாய்,லட்சமாய்க் கோடி கோடியாய் வா!




Wednesday, June 5, 2013

காதல் ஜோடியா?!


கொடுத்து வைத்தவர்.காதலியோடு ஜாலியா பார்க்கில்  உட்கார்ந்திருக்கிறார் பாருங்க!


அவர் முகம் மட்டுமே தெரிகிறது.

முன்னால் சென்று காதலியின் முகத்தையும் பார்க்கலாமா?!

............................................


.............................


............................


......................

 

அய்யய்யோ!காதலி இல்லையா?


ஹா ஹா ஹா ஹா ஹா







Tuesday, June 4, 2013

ஒரு நொடி சபலம்!ஒரு நொடி இன்பம்!!



சிவராமனுக்குப் பார்க்கப் பார்க்க ஆசை அதிகமானது.

என்ன கலர்!

என்ன அழகு!

உடல் பரபரத்தது.

எத்தனை நாள் ஆச்சு?

இந்த சுகம் மறந்தே போச்சு.

இன்று வாய்ப்பை நழுவ விடக்கூடாது.

கல்யாணி வேறு ஊரில் இல்லை.

ஆனாலும் ஒரு தயக்கம்.

இந்த வயதில் இது தேவையா?

ஏதாவது நோய்,கீய் வந்து தொலைத்தால்?

தன்னைத்தானே சமாதானப் படுத்திக் கொண்டார்.

எல்லோருக்கும் நோய் வருகிறதா என்ன?

அவரவர் தலை விதி.

துணிந்து விட வேண்டியதுதான்.

கல்யாணிக்குத் தெரிந்து விட்டால்?

அவள் கிடக்கிறாள் கிழவி!

முடிவுக்கு வந்தார்.

சுற்றும் முற்றும் பார்த்தார்.

அருகில் சென்றார்

“ஒரு பஞ்சு மிட்டாய் கொடப்பா”

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Monday, June 3, 2013

விண்ணுலகில் கிரிக்கெட்!


ராமுவும் சோமுவும் நீண்ட கால நண்பர்கள்.

இருவருக்கும் வயது 90.

ராமுவுக்கு உடல் நலம் குன்றி படுக்கையில் இருந்தார்.

அவருக்குக் கெடு வைத்து விட்டார்கள் மருத்துவர்கள்.

அவரைப் பார்க்க வந்த  சோமு, ராமுவிடம் சொன்னார்”ராமு!நாம் இருவரும் வாழ்க்கையை மகிழ்ச்சியாகக் கழித்தோம்!இளமையில் ஒவ்வொரு ஞாயிறன்றும் கிரிக்கெட் விளையாடினோம்,பின்னர் எந்த ஆட்டத்தையும் பார்க்காமல் தவற விட்டதில்லை.நீ விண்ணுலகம் சென்ற பின் அங்கு கிரிக்கெட் இருக்கிறதா என்று எனக்குச் சொல்”

ராமு சொன்னார்”எனது உயிர் நண்பனுக்கு இது கூடச் செய்ய மாட்டேனா?”

மறுநாள் ராமு இறந்து விட்டார்.

ஓரிரு நாட்களுக்குப் பின் சோமு உறங்கிக் கொண்டிருந்த போது யாரோ சோமு,சோமு என அழைக்கும் குரல் கேட்டு கண்விழித்தார்.

அறை ஒளி வெள்ளமாக இருந்தது..

மீண்டும் குரல் கேட்டது....சோமு

அது ராமுவின் குரல்!

சோமு கேட்டார்”யார்?”

"நான்தான் ராமு,விண்ணுலகிலிருந்து... சோமு உனக்கு மகிழ்ச்சியான செய்தி வருத்தமான செய்தி இரண்டும் சொல்லப்போகிறேன்”

”ராமுவா?சொல்லு சொல்லு”

”முதலில் மகிழ்ச்சியான செய்தி!நீ கேட்டபடி இங்கு கிரிக்கெட் இருக்கிறது.ஞாயிறன்று கட்டாயம் ஆட்டம் உண்டு.வயதானவர்களே இங்கு கிடையாது,எல்லோரும் இளமையாகி விட்டோம்.எவ்வளவு நேரம் ஆடினாலும் களைப்படைவதே இல்லை”

“அப்படியா?மிக மகிழ்ச்சி.கெட்ட செய்தி?”

”வரும் ஞாயிறன்று நடக்க இருக்கும் போட்டியில் ஒரு அணிக்கு நீதான் தலைவன்!”

....................................................................

சோமு கேட்காமல் விட்டு விட்டார்..அங்கும் கட்டுப்பாட்டு வாரியம் உண்டா..தலைவர் உண்டா...விண்ணுலக பிரீமியர் லீக் எல்லாம் உண்டா..சூதாட்டம் உண்டா..என்றெல்லாம்!

இருக்கும் ...இங்கிருந்துதானே அங்கு போகிறார்கள்!

Saturday, June 1, 2013

சென்னைப் பதிவர்கள் ’திடீர்’ சந்திப்பு!





இன்று மாலை சென்னையில் மழை மேகங்கள் திரளவில்லை.

ஆனால் சில பதிவர்களின் திடீர் சந்திப்பு ஒன்று நடந்ததாக நம்பத்தகுந்த 
வட்டாரங் களிருந்து தகவல் கிடைத் துள்ளது.

இன்று மாலை 4.30 மணி அளவில் தானைத் தளபதி புலவர் ஐயா தலைமையில் பதிவர்கள் கூடிப் பேசியதாக அறிகிறோம்!

பத்துப் பதினோரு பதிவர்கள் கலந்து கொண்டதாகத் தெரிகிறது, முழுப் பட்டியலும் கிடைக்காத நிலையில் சிலரது பெயர்கள் கசிந்துள்ளது.

தற்போது ஓய்வு பெற்று விட்ட சென்னை பித்தன்,நகைச்சுவை வேந்தர் பால கணேஷ், நெத்தியடி சிவகுமார்(இவர் இல்லாத சந்திப்பும் உண்டா என்ன?!),க்ரைம் நாவல் புகழ் மதுமதி, இளைய புயல் சீனு……….மற்ற பெயர்கள் இன்னும் கிடைக்கவில்லை!

என்ன பேசினார்கள் என்பதும் விரைவில் தெரிய வரும்.

எனக்கு ஒரு வருத்தம்.

முன்பே தெரிந்திருந்தால் நானும் சென்று என்னை அறிமுகம் செய்து கொண்டிருப்பேன்.

வாய்ப்பு நழுவி விட்டது.

பொறுத்திருப்போம்!