பறவைக் கழிவை முகத்தில் பூசும் நடிகைகள்!!

“வாங்க மேடம்!என்ன முக அழகு படுத்தல்தானே?

“ஆமாம்!ஆஸ்கார் விழாவுக்குப் போறேன் .முகம் பள பளன்னு மின்னணும்.புதுசா ஏதாவது முறைகள் இருக்கா?”

“இருக்கு மேடம்!இப்பத்தான் ரொம்பப் புதுசா ஒரு தயாரிப்பு வந்திருக்கு.அதை வைச்சு முக அழகு படுத்தினா முகம் பளிச்சுன்னு இருக்கும்:சுருக்கம் எல்லாம் போய் பத்து வயது குறைஞ்சுடும்!”

“வாவ்! அதையே செய்திடுங்க!இதிலே இருக்கும் பொருள் என்ன?”

”மேடம்!இது பறவைகளின் எச்சத்தில் செய்தது!ரொம்ப விலை உயர்ந்தது.உங்களை மாதிரிப் பிரபலமானவங்கதான் செய்துக்க முடியும்”

(எந்தக் கழிவுல செய்தா என்ன?முகம் அழகானாச் சரிதான்!)

”அதோட  என்னோட முடியையும் அழகு படுத்தணும் ”

“சரி மேடம்!அதுக்கும் புதுசா ஒரு தைலம் வந்திருக்கு.காளை மாடு இருக்கில்ல(எங்க இருக்கு, அதுதான் பூட்ச்சே!) அதோட விரைக் கொட்டையை நசுக்கிச் செய்தது.முடி அப்படியே அலை அலையா இருக்கும்!”

மேலே சொன்னதெல்லாம் கற்பனையல்ல,நிஜம்!

இந்த ஆண்டு ஆஸ்கார் பரிசளிப்பு விழாவில் கலந்து கொள்ளும் நட்சத்திரங்கள் தங்களை அதற்கு அழகு படுத்திக் கொள்ளச் செய்யும் முயற்சிகளின் ஒரு சிறு பார்வை இது!

இன்னும் எத்தனையோ!

250000 டாலர் செலவில் கருப்பு வைர நகப்பூச்சு!

முன்பு ஒரு நடிகை தன் உடலில் அட்டைகளை விட்டு ரத்தத்தை உறிஞ்சச் செய்தாராம்(டெமி மூர்)-ரத்தத்தில் உள்ள நச்சுத்தன்மையை நீக்க!!

இந்த ஆண்டு முகச் சுருக்கங்களை நீக்கிப் பொலிவு தர,கொஞ்சம் ரத்தம் எடுத்து அதிலிருந்து சில மூலகங்களை நீக்கி அதனுடன்,சரும நிரப்பிகளைச் சேர்த்துத் தோலில் உட்செலுத்தும் புதிய முறை வந்திருக்கிறதாம்!

பறவை எச்சம்,காளை மாட்டின் கொட்டை,அட்டைக்கடி இன்னும் என்ன?

பூனை மூத்திரம்,(புனுகு என்பதே ஒரு வகைப் பூனையின் கழிவுதான்),சிங்கப்பல் பஸ்பம்(நிஜ சிங்கப்பல்,சில மனிதர்களுக்கு இருக்குமே அந்த சிங்கப்பல்லல்ல) இப்படி ஏதாவது வருமோ!

அடக்கடவுளே!